२२ असार, काठमाडौँ । ब्राजिलियन फुटबलका चर्चित स्टार नेयमार जुनियरले अन्तर्राष्ट्रिय फुटबलबाट सन्न्यासको घोषणा गर्नुभएको छ । जारी फिफा विश्वकप २०२६ को अन्तिम-१६ को खेलमा नर्वेसँग २-१ ले पराजित हुँदै ब्राजिल प्रतियोगिताबाट बाहिरिएलगत्तै ३४ वर्षीय फरवार्ड नेयमारले आफ्नो अन्तर्राष्ट्रिय करिअरलाई विश्राम दिने निर्णय गर्नुभएको हो ।
अमेरिकाको न्युजर्सी रंगशालामा भएको उक्त खेलमा ब्राजिलका लागि नेयमारले नै इन्जुरी समयमा पेनाल्टीमार्फत एकमात्र सान्तवना गोल गर्नुभएको थियो । चोटका कारण पूर्ण फिट नभएका नेयमारले यस विश्वकपमा केवल दुई खेलमा वैकल्पिक खेलाडीका रूपमा मात्र मैदान प्रवेश गर्ने अवसर पाउनुभयो । आफ्नो खेल जीवनमा चारवटा फिफा विश्वकप खेलेका नेयमार ब्राजिलियन राष्ट्रिय पुरुष टोलीको इतिहासमा सबैभन्दा धेरै गोल गर्ने खेलाडी हुनुहुन्छ ।
सन् २०१० मा सिनियर टोलीबाट डेब्यु गर्नुभएका उहाँले ब्राजिलका लागि १२९ खेल खेल्दै ८० गोलको शानदार कीर्तिमान बनाउनुभयो । नर्वेसँगको पराजयपछि निकै भावुक बन्दै नेयमारले भन्नुभयो , “मैले देशका लागि धेरै प्रयास गरेँ । मेरो अन्तर्राष्ट्रिय यात्रा यही रंगशालाबाट सुरु भएको थियो र आज यहीँ आएर अन्त्य भयो । अब ब्राजिलको जर्सीमा मेरो यात्रा सकियो ।”
