जापानको वाकायामा जिल्ला अदालतले आफ्नै २ वर्षीया छोरीमाथि दुर्व्यवहार गरी आवश्यक खाना र उपचार नदिँदा मृत्यु भएको घटनामा आमाबुबालाई जनही ८ वर्षको कैद सजाय सुनाएको छ।
अदालतले जुलाई १५ मा २६ वर्षीय हारु ताइरा र उनकी २६ वर्षीया पत्नी नानामी ताइरा लाई अभिभावकको जिम्मेवारी पूरा नगरी बालिकाको मृत्यु गराएको अभियोगमा दोषी ठहर गरेको हो। दुवैले अदालतमा आफूमाथि लागेको आरोप स्वीकार गरेका थिए।
अभियोगअनुसार उनीहरूले वाकायामा सहरस्थित घरमा आफ्नी २ वर्षीया छोरी रुनामाथि शारीरिक दुर्व्यवहार गरेका थिए। बालिका घाइते भएर सामान्य रूपमा खाना खान नसक्ने अवस्थामा पुगे पनि उनीहरूलाई अस्पताल नलगिएको अभियोजन पक्षले जनाएको छ।
सन् २०२५ जुलाई मा बालिकाको चोटका कारण उत्पन्न गम्भीर शारीरिक समस्याबाट मृत्यु भएको थियो। मृत्यु हुँदा उनको तौल करिब ६ किलोग्राम मात्र रहेको बताइएको छ, जुन सो उमेरका बालबालिकाको औसत तौलभन्दा निकै कम हो।
अदालतले बालिकाको स्वास्थ्य अवस्था अत्यन्त कमजोर भएको कुरा आमाबुबालाई थाहा हुँदाहुँदै पनि आवश्यक उपचार नगराएको निष्कर्ष निकालेको छ। न्यायाधीशले पूर्ण रूपमा अभिभावकमाथि निर्भर बालिकाले असाधारण शारीरिक र मानसिक पीडा भोग्नुपरेको उल्लेख गरेका छन्।
सरकारी वकिलले दुवैका लागि जनही ९ वर्षको कैद माग गरेका थिए। अदालतले घटनाको गम्भीरता, लामो समयसम्म भएको दुर्व्यवहार र उपचार नगरिएको तथ्यलाई आधार मान्दै जनही ८ वर्षको कैद सजाय सुनाएको हो।
