३ असार, चितवन । स्टार स्ट्राइकर लिओनल मेस्सीको सानदार ह्याट्रिकको मद्दतले अर्जेन्टिनाले फिफा विश्वकपमा विजयी सुरुवात गरेको छ । अल्जेरियाविरुद्धको एकपक्षीय खेलमा कप्तान मेस्सी एक्लैले तीन गोल गरेपछि अर्जेन्टिनाले ३–० को सहज जित निकालेको हो । सन् २००६ देखि निरन्तर विश्वकप खेल्दै आएका भेट्रान खेलाडी मेस्सीको विश्वकप इतिहासमै यो पहिलो ह्याट्रिक समेत हो । यसअघिका कुनै पनि संस्करणमा उनले ह्याट्रिक पूरा गर्न सकेका थिएनन् ।
खेलको पहिलो हाफको १६औं मिनेटमा मेस्सीले गोल गर्दै टोलीलाई सुरुवाती अग्रता दिलाएका थिए । जर्सी नम्बर १० का यी दिग्गज खेलाडीले मैदानको बीचभागबाट बल नियन्त्रणमा लिँदै पेनाल्टी एरियातर्फ अघि बढेर अल्जेरियाका गोलकिपर जिदानलाई छक्याउँदै देब्रे खुट्टाबाट शक्तिशाली प्रहारमार्फत गोल गरेका थिए । पहिलो हाफमा एक गोलको अग्रता बनाएको अर्जेन्टिनाका लागि मेस्सीले दोस्रो हाफको ५८औं मिनेटमा व्यक्तिगत दोस्रो गोल गर्दै टोलीको अग्रता दोब्बर बनाए ।
त्यसपछि खेलको ७६औं मिनेटमा मेस्सीले व्यक्तिगत तेस्रो गोल थप्दै आफ्नो ऐतिहासिक ह्याट्रिक पूरा गरे र टोलीको जित सुनिश्चित गरे । यस ह्याट्रिकसँगै विश्वकपमा मेस्सीको कुल गोल संख्या १६ पुगेको छ । यो कीर्तिमानसँगै उनी विश्वकप इतिहासमा सर्वाधिक गोल गर्ने खेलाडीको सूचीमा दोस्रो स्थानमा उक्लिएका छन् । उनले जर्मनीका पूर्व स्ट्राइकर मिरोस्लाभ क्लोजको १६ गोलको ऐतिहासिक कीर्तिमानसँग बराबरी समेत गरेका छन् ।
